అయ్యర్‌ను ఔట్ చేసిన అమ్మ.. వీడియో చూసి ఫ్యాన్స్ ఫిదా.. ఫ‌న్నీ కామెంట్స్!

టీమిండియా స్టార్ క్రికెటర్, పంజాబ్ కింగ్స్ (పీబీకేఎస్) కెప్టెన్ శ్రేయస్ అయ్యర్ మైదానంలో తనదైన బ్యాటింగ్‌తో బౌలర్లకు చుక్కలు చూపిస్తుంటాడు. కానీ, అలాంటి స్టార్ బ్యాటర్ తన ఇంట్లోనే స్వయానా తన తల్లి చేతిలో క్లీన్ బౌల్డ్ అయ్యాడు. ప్రస్తుతం అంతర్జాతీయ క్రికెట్‌కు దూరంగా కుటుంబంతో సమయం గడుపుతున్న అయ్యర్, ఇంట్లో తన తల్లితో సరదాగా క్రికెట్ ఆడాడు. ఈ ఆటకు సంబంధించిన ఓ సరదా వీడియో ఇప్పుడు సోషల్ మీడియాలో వైరల్ అవుతోంది.

ప్రస్తుతం జాతీయ జట్టుకు దూరంగా ఉన్న శ్రేయస్ అయ్యర్, తన ఇంట్లో తల్లి బౌలింగ్ చేస్తుండగా బ్యాటింగ్ చేశాడు. ఈ క్రమంలో ఆమె వేసిన ఒక బంతిని అంచనా వేయడంలో విఫలమై క్లీన్ బౌల్డ్ అయ్యాడు. ఈ ఫన్నీ మూమెంట్‌ను వీడియో తీసి పంచుకోగా, అది క్షణాల్లో వైరల్‌గా మారింది. ఈ వీడియోను శ్రేయస్ అయ్యర్ ఐపీఎల్ జట్టు పంజాబ్ కింగ్స్ తమ అధికారిక 'ఎక్స్' (ట్విట్టర్) ఖాతాలో పోస్ట్ చేసింది. "మా సరపంచ్ క్లీన్ బౌల్డ్ అయినా ఫర్వాలేని ఏకైక సందర్భం ఇదే" అంటూ ఓ సరదా క్యాప్షన్ జోడించింది.

ఈ వీడియో చూసిన అభిమానులు, నెటిజన్లు ఫన్నీ కామెంట్లతో హోరెత్తిస్తున్నారు. "ఒక బౌన్సర్, ఆ తర్వాత ఒక యార్కర్ వేయండి. వికెట్ పక్కా దొరుకుతుంది" అని ఒక అభిమాని సూచించగా, "భారత్-ఇంగ్లండ్ రెండో టెస్టు మ్యాచ్‌కు ఆంటీ అందుబాటులో ఉన్నారా?" అంటూ మరో అభిమాని చమత్కరించాడు. "ఆ రెండో బంతి చాలా పర్ఫెక్ట్ స్పాట్‌లో పడింది, కచ్చితంగా మెచ్చుకోవాలి" అని ఇంకో నెటిజన్ కామెంట్ చేశాడు.

ప్రస్తుతం ఇంగ్లండ్ పర్యటనలో ఉన్న భారత టెస్టు జట్టులో శ్రేయస్ అయ్యర్‌కు చోటు దక్కలేదు. ఆగస్టు 17 నుంచి బంగ్లాదేశ్‌తో ప్రారంభమయ్యే వైట్-బాల్ సిరీస్‌లో అతను తిరిగి జట్టులోకి వచ్చే అవకాశం ఉంది. ప్రస్తుతానికి ఈ విరామ సమయాన్ని అయ్యర్ తన కుటుంబంతో ఆనందంగా గడుపుతున్నాడు.